Nakapahimulos sa pagbansay sa paggamit sa Microsoft Productivity Tools ang mga Persons with Disabilities o PWDs pinaagi sa programang gipahigayon sa City Government of Dipolog, pinaagi sa City Social Welfare and Development Office ug Tech4ED Center Unit, sa pakigtambayayong sa Department of Information and Communications Technology o DICT Zamboanga del Norte niadtong Hulyo 16 sa Gallery 3 sa Museo Dipolog.
Gidumala ni Project Development Officer II Al Vincent M. Recentes ang maong pagbansay diin gitudloan ang mga partisipante sa batakang paggamit sa kompyuter ug digital devices, lakip ang paggamit sa Microsoft productivity tools pinaagi sa mga praktikal nga ehersisyo aron mapalambo ang ilang digital nga kahibalo ug kahanas.
Kabahin usab sa programa ang mga mensahe gikan sa mga opisyal sa City Social Welfare and Development Office, DICT ug City Government of Dipolog nga nagpasiugda sa kamahinungdanon sa digital literacy ug paghatag og patas nga oportunidad sa pagkat-on alang sa tanang sektor sa komunidad.
Gitapos ang kalihokan pinaagi sa paghatag og sertipiko sa mga partisipante isip pag-ila sa ilang malampusong pagkompleto sa pagbansay, samtang gipadayag sa City Government of Dipolog ang padayon nga paningkamot sa pagpalig-on sa inklusibo ug digital nga kahibalo sa mga Persons with Disabilities.(JENIFFER JR. DELICA)
Source: Dipolog City Social Welfare and Development Office