Opisyal nga gitapos sa Zamboanga del Norte 2nd Provincial Mobile Force Company (PMFC) ang unom ka buwang deployment sa Retooled Community Support Program–Police Serbisyo sa Barangay (R-PSB) sa Barangay Situbo, dungan sa graduation sa mga miyembro sa Cympil Situbo Alsa Masa Farmers Association nga nakahuman sa Electrical Installation and Maintenance NC II Training sa TESDA.
Gipahigayon ang ceremonial turnover ug graduation ceremony niadtong Hunyo 16 sa Covered Court sa Barangay Situbo ubos sa pagpanguna ni PLTCOL Edwin D. Verzon, Force Commander sa ZN 2nd PMFC.
Sumala sa kapolisan, ang R-PSB deployment nakatampo sa pagpalig-on sa panaghiusa sa komunidad, pagpataas sa kahibalo sa publiko bahin sa kalinaw ug kaluwasan, ug pagpalambo sa koordinasyon tali sa kapolisan ug mga residente.
Gipasiugda usab nga ang programa nahimong instrumento sa pagpalig-on sa peace-building initiatives, community development, ug paghatod sa nagkalainlaing serbisyo sa gobyerno ngadto sa mga komunidad.
Samtang, malampusong nakagradwar ang mga miyembro sa Cympil Situbo Alsa Masa Farmers Association sa Electrical Installation and Maintenance NC II Training, nga naghatag kanila og teknikal nga kahibalo ug kahanas alang sa dugang oportunidad sa panginabuhian ug panarbaho.(IKEN B. GULLEM)
Source: PNP Zamboanga del Norte 2nd PMFC