Dili lang kasaysayan ang gisaulog sa Dakbayan sa Dapitan sa pagsugod sa ika-63 Charter Day celebration, kondili usab ang mas lig-on nga direksiyon niini padulong sa usa ka “smart,” malungtaron, ug mas inklusibong siyudad.
Sa opisyal nga pagbukas sa semana nga selebrasyon, gipasiugda ni Mayor Evelyn T. Uy nga ang tema nga “Honoring Our Past, Innovating Our Present, Sustaining Our Future” nagpakita sa paningkamot sa dakbayan sa paghiusa sa adunahan nga kabilin ug modernong kalamboan.
Isip kabahin sa panglantaw sa siyudad, gipalig-on sa lokal nga panggamhanan ang pagpatuman sa Blue Economy, usa ka estratehiya nga nagpunting sa responsableng paggamit sa kadagatan aron mapadako ang panginabuhian ug mapalambo ang ekonomiya sa mga komunidad sa kabaybayonan.
Gipasiugda usab ang pagtukod og climate-resilient nga imprastraktura, pagpreserbar sa kinaiyahan, paghatag og luwas nga mga luna alang sa kabataan, ug pagpalig-on sa transparent ug epektibong pagdumala aron masiguro nga ang mga programa sa siyudad makaabot hangtod sa mga barangay.
Giila usab ni Mayor Uy nga ang bag-ong mga kalampusan sa Dapitan isip usa ka nag-uswag nga green ug smart city dili lamang bunga sa paningkamot sa lokal nga panggamhanan, kondili usab sa aktibong partisipasyon sa mga Dapitanon sa pagmintinar sa kalimpyo, kahapsay, ug pagpalambo sa lokal nga ekonomiya.(IKEN B. GULLEM)
Source: Zamboanga del Norte Provincial News Network