Giablihan na ang PWD Paugnat 2025, isip kabahin sa selebrasyon sa 2025 National Disability Rights Week dinhi sa siyudad sa Dipolog City, nga nagsugod niadtong Hulyo 14 ug magpadayon hangtod sa Hulyo 23, 2025.
Gipasiugdahan kini sa City Social Welfare and Development – Persons with Disability Affairs Office (CSWD-PDAO), pinaagi sa pangulo niini nga si Disability Affairs Officer IV (DAO IV) Roel R. Zorilla, uban ang suporta sa nagkalain-laing barangay ug sectoral groups sa siyudad.
Ang PWD Paugnat 2025 usa ka lima ka adlaw nga kalihokan nga gipahigayon niining Hulyo 14, 15, 16, 18, ug 23 sa napiling mga barangay sa Dipolog City. Lakip sa mga aktibidad ang sports competitions, larong Pinoy, ug entertainment programs, diin aktibong misalmot ang mga Persons with Disability (PWDs) sa siyudad.
Gibanabanang 276 ka partisipante ang mipakita sa ilang suporta ug partisipasyon atol sa unang adlaw sa kalihokan, nga nagpakita sa ilang kadasig sa pagpakabana ug pagpasigarbo sa ilang katungod ug papel sa katilingban.
Sa Hulyo 17, ipahigayon ang usa ka motorcade sa nag-unang mga kadalanan sa siyudad isip opisyal nga kick-off activity sa selebrasyon, samtang sa Hulyo 23, ang championship games sa PWD Paugnat 2025 ipahigayon sa Dipolog City Sports Complex, Barangay Olingan.
Sa temang: “Innovation for Inclusion: Building Inclusive Communities Together,”
nag-awhag kini sa tanang sektor sa katilingban nga magtinabangay aron mapanday ang usa ka inklusibong komunidad diin walay mabyaan.
Ang maong kalihokan nagpakita sa nagpadayon nga suporta sa lokal nga kagamhanan alang sa mga Persons with Disability ug sa ilang aktibong partisipasyon sa mga kalambuan sa dakbayan.(Jumalisa Papa)
Source: Dipolog City Government