Mas napadali ang pag-avail sa benepisyo ug healthcare services sa mga Filipino veterans ug ilang mga benepisyaryo human gidala sa Dipolog City ang “Lakbay Serbisyo sa Bagong Pilipinas” outreach program sa Philippine Veterans Affairs Office (PVAO) ug partner agencies.
Ang maong kalihokan gipahigayon sa PVAO-Pagadian Field Office uban sa AFP Gratuity Management Center, PhilHealth, ug Our Lady of Manaoag Medical Clinic, sa pakigtambayayong sa City Government of Dipolog.
Gihatagan og nagkadaiyang serbisyo ang mga beterano lakip ang updating sa records, pagsumite ug follow-up sa claims alang sa benepisyo, pag-isyu sa identification cards, medical consultation ug check-up, ingon man electrocardiogram o ECG services.
Pinaagi sa outreach activity, mas giduol sa gobyerno ang mga serbisyo ngadto sa mga beterano ilabina kadtong naglisod sa pag-adto sa mga opisina aron makuha ang ilang kinahanglanon nga assistance ug benepisyo.
Gipasabot sa PVAO nga ang maong programa kabahin sa padayon nga pag-ila ug pagpasalamat sa sakripisyo sa mga Filipino veterans pinaagi sa paghatag kanila og mas sayon ug accessible nga serbisyo gikan sa gobyerno.
Ang kalihokan nakatabang usab sa pagpalig-on sa koordinasyon tali sa mga ahensya ug lokal nga panggamhanan aron mas mapalapdan pa ang serbisyo alang sa mga beterano sa Dipolog City ug kasikbit nga mga lugar.(IKEN B. GULLEM)
Source: Dipolog City Government