Nadakpan sa kapulisan sa Cebu City Police Office ang usa ka lalaki nga giila nga Top 5 Most Wanted Person sa lebel sa rehiyon atol sa operasyon sa pagsilbi sa warrant of arrest sa Sitio Ermita Proper, Barangay Ermita, Cebu City sa buntag sa Mayo 29, 2026.
Ang operasyon gipahigayon sa Warrant Server sa Police Station 5 ubos sa pagdumala ni Police Captain Venstine Ponce Bointilao. Ang suspetsado nag-atubang og kasong murder ug adunay warrant of arrest nga gipagawas sa Regional Trial Court Branch 14 sa Cebu City niadtong Mayo 26, 2026.
Sumala sa korte, walay piyansa nga gitugot alang sa maong kaso. Human sa pagdakop, gidala dayon ang suspetsado ngadto sa Police Station 5 aron sa hustong dokumentasyon, booking, ug pagproseso sa iyang kaso.
Sa pagkakaron, gipabilin siya sa custodial facility sa Police Station 5 samtang naghulat sa iyang turnover ngadto sa tukmang korte alang sa dugang nga legal nga proseso.
Gipadayag sa Cebu City Police Office nga ang malampusong operasyon nagpakita sa ilang padayon nga paningkamot sa pagdakop sa mga wanted person, ilabi na kadtong nalambigit sa seryosong krimen, aron mapalig-on ang hustisya ug masiguro ang kaluwasan sa publiko.
📸 CCPO
I via Renante Socia Lada