Mitampo sa KASIDLAK Life Blood Drive 2026 ang mga personnel sa Dapitan City Police Station niadtong Hunyo 17, 2026 aron makatabang sa pagdugang sa suplay sa dugo alang sa mga pasyenteng nanginahanglan niini.
Gipahigayon ang kalihokan ubos sa tema nga “Dugo Alang sa Kinabuhi, Bugas Alang sa Pamilya” pinaagi sa panagtambayayong sa nagkalain-laing sektor aron dasigon ang boluntaryong pagdonar og dugo ug pagsuporta sa mga serbisyong panglawas sa komunidad.
Boluntaryong midonar og dugo ang mga kapulisan isip kabahin sa ilang padayong pag-alagad dili lamang sa pagmintinar sa kalinaw ug kahapsay kondili usab sa mga makatawhanong kalihokan nga makatabang sa pagluwas og kinabuhi.
Pinaagi sa ilang partisipasyon, gipakita sa Dapitan City Police Station ang panaghiusa ug malasakit sa komunidad samtang nagpalig-on sa kampanya sa paghatag og luwas ug igo nga suplay sa dugo alang sa mga nanginahanglan.(JENIFFER JR. DELICA)
Source: PNP Dapitan City Police Station ZNPPO