DIPOLOG CITY — Mokabat sa 75 ka senior citizens ang nakadawat og cash gift gikan sa gobyerno pinaagi sa Republic Act No. 11982 o Expanded Centenarian Act of 2024 atol sa payout activity nga gipahigayon niadtong Hunyo 15.
Ang maong kalihokan gipasiugdahan sa City Government of Dipolog pinaagi sa City Social Welfare and Development Office (CSWDO) ug Office of the Senior Citizens Affairs (OSCA), sa pakigtambayayong sa National Commission of Senior Citizens (NCSC), didto sa OSCA Covered Court sa Barangay Sta. Isabel.
Tumong sa programa ang paghatag og pinansyal nga insentibo ug pag-ila sa kontribusyon sa mga tigulang nga Pilipino samtang nagpadayon ang gobyerno sa pagpalig-on sa mga programa alang sa ilang kaayohan ug proteksyon.
Sumala sa mga opisyal, ang maong payout nagpakita sa padayon nga pasalig sa nasyonal ug lokal nga pangagamhanan sa pag-atiman sa dignidad, kahimtang ug kaayohan sa mga senior citizens sa komunidad.(JENIFFER JR. DELICA)
Source: Dipolog City Government