Pinaagi sa direktang pagmonitor sa kalamboan sa Siari Valley Agrarian Reform Beneficiaries Multi-Purpose Cooperative (SVARBEMCO) sa Sindangan, mas gipalig-on sa Department of Agrarian Reform sa Zamboanga del Norte ang ilang suporta niini sa mga mag-uuma human mipahigayon og on-site evaluation.
Gipangulohan ni Provincial Agrarian Reform Program Officer II Daisy Dell Suan Digamon uban ni PARPO I Engr. Alfonso A. Tan ang on-site evaluation sa kooperatiba aron susihon ang kahimtangan sa mga proyekto nga gitabangan sa DAR.
Gitutokan usab sa pagbisita ang epekto sa mga livelihood assistance ug ang pagplano sa mga lakang aron masiguro ang malungtarong pagpadayon sa operasyon sa kooperatiba.
Atol sa ilang pagsusi, gipasiugda ni Digamon ang direksyon nga gipangulohan ni Conrado Estrella III, nga nagtinguha nga ang mga Agrarian Reform Beneficiary Organizations (ARBOs) mahimong lig-on ug kompetitibong agri-entrepreneurs.
Samtang, giawhag niya ang SVARBEMCO nga palapdan ang merkado sa ilang mga produkto ug pahimuslan pag-ayo ang teknikal ug pinansyal nga suporta sa DAR aron mapataas ang produksyon ug kita sa mga miyembro.(IKEN B. GULLEM)
Source: DAR Zambonorte