Gipakita pag-usab sa lokal nga pangagamhanan ang ilang komitment pinaagi sa padayon nga pag-instalar sa public elevator sa Sindangan People’s Government Center (Bag-ong Municipal Building), usa ka proyekto sa Lokal nga Pangulohan sa Sindangan ubos sa pagpanguna ni Mayor Glona G. Labadlabad, nga nagtumong sa mas inklusibo ug mas accessible nga serbisyo publiko.
Ang maong pasilidad gilauman nga maghatag og dakong kaayohan ilabi na sa persons with disabilities (PWDs), mga senior citizen, buntis nga kababayen-an, ug mga indibidwal nga adunay temporaryong injury, aron sayon ug luwas nilang maabot ang tanang andana sa municipal building.
Ang public elevator gidesinyo aron makasakay og hangtod 13 ka pasahero
ug magsilbi sa tulo (3) ka andana sa municipal hall. Gitakdang mahuman ug magamit kini sa bulan sa Marso ning tuiga.
Ang maong proyekto usa ka pamatuod sa padayong paningkamot sa LGU sa Sindangan sa pagtukod og usa ka mas episyente, malinaw-on, ug katawhanong palibot sa serbisyo publiko.(IKEN B. GULLEM)
Source: Local Government Unit of Sindangan