Walay dugang bug-at nga pas-anon sa mga taxpayers ang giplanong pag-update sa Schedule of Market Values (SMV) sa Dapitan City, sumala sa gipasalig sa lokal nga kagamhanan atol sa public consultation nga gipahigayon sa City Assessor’s Office (CAssO) niadtong Mayo 12 ngadto sa 13 sa Government Center Amphitheater.
Gipatin-aw ni Mayor Evelyn “Belen” T. Uy nga bisan mandato sa nasudnong gobyerno ang pag-update sa property valuation ubos sa Republic Act No. 12001 o Real Property Valuation and Assessment Reform Act (RPVARA), gisiguro sa syudad nga dili kini mahimong dakong palas-anon sa katawhan.
Matod sa mayor, iya nang gimandoan daan ang assessment officers nga magmatngon sa bisan unsang adjustment aron maprotektahan ang interes sa mga residente samtang ginapalig-on ang local governance ug serbisyo publiko.
Atol sa technical briefing, gipresentar nila City Assessor Noli T. Gandamon, Assistant City Assessor Jasper Carl Y. Cuevas, ug ubang opisyal sa CAssO ang proposed revisions alang sa urban ug agricultural lands, buildings, structures, ug machinery.
Samtang, gipahibalo ni City Councilor Atty. Jeneth N. Baje nga magpasa og curative ordinance ang Sangguniang Panlungsod aron matul-id ang clerical error sa 2024 Revenue Code nga nakagamit gihapon sa outdated 2014 assessment schedule imbes sa updated 2023 version.
Apan gipasalig ni Baje nga walay epekto ang maong sayop sa kasamtangang tax collection sa City Treasurer’s Office.
Ang pag-update sa property valuation kabahin sa tumong sa RPVARA nga ma-standardize ang real property valuation sa tibuok nasud subay sa international standards aron mas mapalambo ang local governance.
Gitambongan usab ang konsultasyon nila Vice Mayor Gabriel M. Cad, mga miyembro sa Sangguniang Panlungsod, representante sa Bureau of Internal Revenue, barangay officials, ug ubang stakeholders sa syudad.(IKEN B. GULLEM)
Source: Dapitan City Government