Han-ay nga napahigayon sa Presidential Task Force on Media Security(PTFOMS) ang usa ka konsultasyon sa mga lokal nga media practitioners ning dakbayan sa Dipolog nga gipahigayon sa adlawng Lunes, Pebrero 9, 2026, didto sa Morgias, Mibang, Sta. Filomena.
Ang kalihukan gipanguluhan ni PTFOMS Executive Director, USEC. Jose A. Torres, Jr. uban sa iyang kasaligan nga mga miyembro nga sila si Atty. Francis Rupert C. Mangrobang, PTFOMS Legal Adviser; Atty Eric Glenn Peralta, PTFOMS Senior Investigator; ug si Emmanuel D. Taghoy, Assistant Regional Head gikan sa Philippine Information Agency(PIA).
Tumong sa panagtipok ang pagtudlo sa mga lokal nga media sa angay buhaton og kinsay duolon panahon sa emerhensiya. Pinaagi sa hotline number nga 0965-031-0377, pwedeng motawag ang mga tigpamaba ning dakbayan kung makasinati sila og mga hulga sa ilang kinabuhi o sa bisan unsa paman nga pagpang abuso.
Gipalig-on sa maong grupo dili lang ang kinabuhi sa mga media, kundi lakip usab ang ilang kagawasan ug seguridad batok sa mga posibling risgo panahon sa ilang trabaho.
Dugang pa, gipauswag usab ang kahibalo sa mga tigbalita pinaagi sa pagtudlo sa “Fake News and Disinformation” ug paunsa mahibal-an daun ang katinuod sa usa ka impormasyon. Gitapos daun kini sa mas lalom nga diskusyon sa open forum kung asa gitubag sa mga resource speakers ang tanan nga angay mahibaw-an kabahin sa konsultasyon.
Mipadayag usab og dakong pasalamat ang PTFOMS Executive Director nga si USEC. Torres Jr. sa tanang mga mitambong og mihatag suporta sa maong panagtipok ug iyang gitunol ngadto ang mga certificates sa tanang media ug PNP personnel nga hustong migahin sa ilang oras sa pagpaminaw sa makabuluhanong konsultasyon.(JENIFFER JR. DELICA)