Gitapos sa Philippine Statistics Authority (PSA) Zamboanga del Norte ang pagsaulog sa 52nd Nutrition Month pinaagi sa feeding program ug health and wellness lecture alang sa mga kindergarten learners sa Olingan Elementary School sa Dipolog City niadtong Hulyo 31, 2026.
Kabahin sa kalihukan ang pagdasig sa mga kabataan ug ilang mga ginikanan sa kamahinungdanon sa hustong nutrisyon, maayong personal nga kahinlo, ug himsog nga pamaagi sa panginabuhi. Gitambongan kini sa mga magtutudlo, barangay officials, ug mga empleyado sa PSA.
Sa iyang mensahe, gipasiugda ni Principal IV Maria Fe Grace P. Dinampo ang papel sa hustong nutrisyon sa husto nga pagtubo ug pagkat-on sa mga bata, samtang mipasalamat sa PSA sa paghatag sa maong inisyatibo.
Usa sa mga highlight sa programa ang Health and Wellness Lecture nga gipahigayon ni Ginna B. Sinlao, gisundan sa feeding activity diin giserbisyuhan og masustansiyang snacks ang mga kindergarten learners ug gipanghatagan sila og simpleng mga token.
Human sa kalihukan, nagpahigayon usab ang mga empleyado sa PSA Zamboanga del Norte og “Salu-salo sa Hapagkainan” isip kabahin sa pagtapos sa Nutrition Month ug pagpalig-on sa panaghiusa sa opisina.
Matod sa PSA, ang maong inisyatibo kabahin sa padayon nilang suporta sa mga programa nga nagpalambo sa nutrisyon ug kahimsog sa mga kabataan pinaagi sa pakigtambayayong sa mga eskwelahan ug lokal nga komunidad.(IKEN B. GULLEM)
Source: PSA Zamboanga del Norte