Mikabat sa 55 ka engineers ug project personnel gikan sa nagkalain-laing opisina sa National Irrigation Administration (NIA) Region IX sa tibuok Zamboanga Peninsula ang gihiusa sa upat ka adlaw nga workshop aron mapalig-on ang ilang kahibalo ug kahanas sa materials sampling ug testing alang sa mas lig-on nga mga proyekto sa irigasyon.
Gipahigayon ang Workshop on Sampling and Testing of Materials – Batch 2 sa Balintawak, Pagadian City gikan Hulyo 27 hangtod 30, diin mitambong ang mga Planning, Design and Construction Engineers ug Project-in-Charge personnel gikan sa tanang NIA offices sa rehiyon.
Atol sa workshop, gipalawom sa mga partisipante ang ilang kahibalo sa husto nga pagsusi sa yuta, konkreto, reinforcing steel bars, ug uban pang construction materials aron masiguro nga mosunod kini sa engineering standards ug kalidad nga gikinahanglan sa mga proyekto sa irigasyon.
Gilakip usab sa pagbansay ang mga lecture ug hands-on exercises sa materials sampling ug testing, ingon man ang mga pamaagi sa pag-ila sa posibleng depekto sa konstruksyon ug paghatag og tukmang solusyon aron mapadayon ang kalig-on ug kalidad sa mga pasilidad sa irigasyon.
Nahatagan og teknikal nga pagbansay ang mga partisipante pinaagi nila Mary Rose N. Reyes, Soil Technologist sa NIA Central Office, ug Engr. Cyril B. Sabete, Material Engineer sa JRMP Material Testing Quality Center, nga mipakigbahin sa ilang kahibalo aron mapalambo pa ang kalidad sa mga proyekto sa irigasyon sa tibuok Zamboanga Peninsula.(IKEN B. GULLEM)
Source: NIA Zamboanga Peninsula