Nagpadayon ang Philippine Statistics Authority (PSA) Zamboanga del Norte sa ikatulong hugna sa ilang training alang sa Retail Price Survey (RPS) niadtong Hulyo 28 hangtod 29, 2025, nga gipahigayon sa Conference Hall sa A4M Building, Barangay Miputak, ning siyudad sa Dipolog.
Gitambongan kini sa mga field personnel, enumerators, ug uban pang kawani sa buhatan nga nalambigit sa pagkolekta sa datos alang sa retail price monitoring.
Gipangulohan sa PSA ZDN Provincial Statistics Officer nga si Engr. Kenneth C. Aniñon ang pagbukas sa training, diin iyang gipasiugda ang kahinungdanon sa tukma ug lig-on nga datos, tungod kay kini gamiton sa gobyerno sa paghimo sa mga polisiya sa ekonomiya ug sa pagsubay sa kalamboan sa presyo sa mga produkto ug serbisyo sa merkado.
Gidumala sa mga kwalipikadong trainors ang sesyon sa pagbansay nga nagtutok sa tukmang pamaagi sa pagkolekta sa presyo, pagpuno sa survey forms, paggamit sa tablet o electronic questionnaire, ug sa follow-up sa mga tindahan nga kasagaran surbeyhan. Apil usab sa mga gihisgutan ang standard operating procedures (SOPs), survey protocols, ug ang mga isyu nga kasagarang masinati.
Ang Retail Price Survey usa ka regular nga kalihokan sa PSA nga nagtumong sa pag-monitor sa presyo sa mga konsumo nga produkto sa mga napiling merkado sa tibuok nasud. Ang datos nga makuha gigamit sa pagtino sa Consumer Price Index (CPI), nga basihan sa sukod sa inflation rate sa Pilipinas.
Pinaagi sa maong training, mas napalig-on ang kapasidad sa mga enumerators sa husto ug episyenteng pagpangolekta sa impormasyon, nga maghatag og kasiguruhan sa kalidad sa datos nga magamit alang sa estadistika ug epektibong pagplano sa ekonomiya.(Jumalisa Papa)
Source: PSA ZDN