Gipasidunggan ni Mayor Roberto Y. Uy ang mga atleta sa Dipolog Aqua Warriors Swimming Team atol sa ilang pagbisita sa City Hall niadtong Hulyo 28, 2025, human sa ilang malampusong pag-apil ug kadaogan sa Long Course Swimming Competition nga gipahigayon sa Barangay Disud, Sindangan, Zamboanga del Norte niadtong Hulyo 26–27, 2025.
Kauban sa courtesy visit si Coach Ted Quijano, iyang asawa nga si Cora, ug ang mga ginikanang mapahitas-on sa kalampusan sa ilang mga anak. Mapasalamaton silang gipresentar ang mga atleta kang Mayor Uy isip pasidungog sa ilang paningkamot ug maayong performance sa maong kompetisyon.
Gidayeg ni Mayor Uy ang mga kabatan-onan sa ilang disiplina, determinasyon, ug kadasig sa isport. Gibutyag usab niya nga ang ilang partisipasyon sa swimming dili lamang nagahatag ug dungog sa siyudad sa Dipolog, apan nagsilbi usab kini nga pamaagi aron malikayan ang mga bisyo ug mapadayon ang maayong pamatasan ug himsog nga panglawas.
Ang kalampusan sa Dipolog Aqua Warriors usa ka dakong inspirasyon alang sa tanang kabatan-onan sa syudad nga adunay tinguha sa sports ug pagpangandam para sa mas hayag nga kaugmaon.(Jumalisa Papa)
Source: Dipolog City Government