Gipadayon sa Department of Agrarian Reform Zamboanga del Norte ang pagpalig-on sa kahibalo sa mga mag-uuma pinaagi sa insurance ug cooperative training alang sa El Paraiso Farmers Agrarian Reform Cooperative sa Barangay El Paraiso, Liloy.
Gipangulohan ni PARPO I Engr. Alfonso A. Tan ang mandatory Fundamentals of Cooperatives (FOC) training isip kabahin sa programa sa Program Beneficiaries Development Division (PBDD) aron mapalambo ang kapasidad sa mga Agrarian Reform Beneficiary Organizations (ARBOs).
Tumong sa maong training nga matudluan ang mga miyembro sa kooperatiba bahin sa hustong pagdumala, partisipasyon sa mga miyembro, ug mga prinsipyo sa kooperatiba aron mahimong mas lig-on ug malungtaron ang ilang organisasyon.
Gihatagan usab og kahibalo ang mga partisipante kabahin sa agricultural insurance underwriting aron masabtan nila ang importansya sa insurance isip proteksyon batok sa posibleng kadaot ug kapildihan sa agrikultura.
Miserbisyo isip resource persons sila SARPO Christy P. Gonzales, ARPO I Runa Jane B. Sabac, ug RSBSA-AIP Coordinator Maureen Kaye T. Soropia nga nagtudlo ug naggiya sa mga mag-uuma atol sa maong training.
Matud sa DAR-ZDN, ang maong inisyatiba kabahin sa padayon nga paningkamot sa ahensya sa pagpalambo sa kapasidad ug panginabuhian sa mga agrarian reform beneficiaries sa lalawigan.(IKEN B. GULLEM)
Source: DAR Zamboanga del Norte Province