Giprioridad sa Sangguniang Bayan sa Sindangan ang proteksyon sa kabataan ug kaayohan sa komunidad atol sa ilang ika-37 nga regular session nga gipahigayon sa Session Hall sa munisipyo.
Lakip sa gihisgutan ang mga proposed ordinances nga nagtinguha sa pagpatuman sa mga nasudnong balaod sama sa Child Safety in Motor Vehicles Act, Domestic Administrative Adoption and Alternative Child Care Act, ug Expanded Anti-Trafficking in Persons Act of 2022.
Sumala sa konseho, ang maong mga lakang gilaraw aron mapalig-on ang proteksyon sa mga bata, masuportahan ang mga pamilya, ug mapugngan ang human trafficking ug uban pang porma sa pag-abuso.
Gihisgutan usab sa sesyon ang Draft Municipal Ordinance No. 293 nga nagtumong sa pag-amendar sa Municipal Revenue Code aron mapalig-on ang kita sa lokal nga panggamhanan alang sa mga programa sa kalamboan.
Samtang, gipresentar usab ang report sa Committee on Health and Sanitation nga nagpakita sa padayon nga paningkamot sa lokal nga gobyerno sa pagmintinar sa kahimsog ug kalimpyo sa komunidad.
Gipasabot sa Sangguniang Bayan nga pinaagi sa aktibong paghimog balaod ug diskusyon, padayon nilang palig-onon ang usa ka luwas, responsibo, ug malambuong komunidad alang sa tanang Sindanganon.(IKEN B. GULLEM)
Source: Municipality of Sindangan