Aron mahisgutan ang mga padayong kalihokan ug umaabot pa nga mga proyekto alang sa pagpasiugda sa heritage tourism sa siyudad sa Dapitan ug sa tibuok rehiyon, ang mga propesor sa Tourism and Hospitality Management sa Jose Rizal Memorial State University(JRMSU) Dipolog nga gipangulohan ni Dr. Lovelle Palega ug Prof. Jan Jacob Solon mibisita kang Dapitan city Mayor Evelyn T. Uy kaniadtong Oktubre 14, 2025.
Sa pagdawat ni Mayor Uy sa mga delegasyon, gipasiugda niya ang dakong papel sa turismo sa pagpanalipod sa kultura ug sa pagpalambo sa ekonomiya sa Dapitan.
Gihisgutan usab ni Mayor Uy ang umaabot nga 13th Regional Congress and Skills Competition of the Council of Tourism and Hospitality Educators in the Zamboanga Peninsula (CTHEZP) nga gilaumang makahatag ug higayon sa siyudad na mapakita ang kasaysayan ug kultura niini ilabina nga umaabot 30 ka Higher Education Institution (HEI) ang gipaabot motambong sa maong kalihukan.
Gipadayag ni Mayor Uy ang aktibong partisipasyon sa JRMSU sa pagpasiugda sa Dapitan isip premier heritage destination ug nagpasalamat sa unibersidad sa tabang niini sa Rizal Tour para sa PEP MTEX nga ipahigayon karong Oktubre 17, 2025.
Kauban usab sa delegasyon sila Prof. Aneja Palomares ug Prof. Danceldale Calago nga mipadayag sa padayon nga kooperasyon sa JRMSU uban sa lokal nga kagamhanan alang sa pagpreserba sa kultura, kalamboan sa turismo, ug edukasyon.
Ang maong pagbisita nagtimaan sa mas lig-on nga panaghiusa tali sa JRMSU ug sa City Government sa Dapitan, nga may usa ka tinguha, ang pagpasiugda sa kasaysayan ug kultura samtang gipalambo ang tourism education ug kalamboan sa rehiyon.(IKEN B. GULLEM)
Source: CITY GOVERNMENT OF DAPITAN