Gipahigayon sa Zamboanga del Norte Kalipunan ng Liping Pilipina o ZN-KALIPI ang 3rd Quarter Meeting sa Plenary Hall sa Zamboanga del Norte Convention and Exhibition Center, Oktubre 14, 2025 aron palig-onon ang papel sa kababayen-an sa kalamboan sa probinsya nga gipasiugdahan sa Provincial Social Welfare and Development Office(PSWDO).
Mitambong ang 33 ka partisipante nga naglakip sa mga City ug Municipal KALIPI Presidents, mga representante sa Local Social Welfare and Development Offices, ug uban pang kaabag nga sektor.
Sa mensahe ni Assistant PSWDO Alex Z. Sabal, nanawagan siya sa mga miyembro nga magpabilin nga aktibo ug mosuporta sa mga kalihukan sa KALIPI. Gibutayag ni Sabal nga si Gobernador Darel Dexter T. Uy adunay daghang programa alang sa kababayen-an, ug nagpasalamat usab siya sa katawhan samtang nagpadulong na siya sa iyang retiro karong Nobyembre 1.
Sa laing bahin, si Rosemarie P. Miranda, Provincial Information Officer, mipasabot sa papel sa Local Councils of Women nga nagtinabangay sa DILG aron mapaabot ang tingog sa kababayen-an sa lokal nga pangagamhanan.
Gipresentar usab ni Johanna W. Lozada, PSWDO Focal Person, ang Action Plan sa KALIPI para sa 2025-2027 nga naglatid sa mga tumong ug programa alang sa mas lawom nga pag-apil sa kababayen-an sa lokal nga kalamboan.
Ang regular nga panagtigum sa ZN-KALIPI nagpakita sa padayon nga paningkamot sa probinsyal nga kagamhanan aron mapalapdan ang partisipasyon sa kababayen-an sa komunidad alang sa inklusibong kauswagan.(JENIFFER JR. DELICA)
Source: Zamboanga del Norte Provincial News Network