Gidakop sa Police Regional Office 9 (PRO 9) ang tulo ka suspek ug nakasakmit ug labaw ₱2.72 milyon nga kantidad sa gituohang shabu atol sa sunod-sunod nga operasyon sa Zamboanga del Sur ug Zamboanga City, isip kabahin sa padayon nga kampanya batok sa illegal nga droga.
Gihimo sa Zamboanga del Sur Provincial Drug Enforcement Unit, kauban ang Philippine Drug Enforcement Agency (PDEA) ug Ramon Magsaysay Municipal Police Station, ang usa ka joint buy-bust operation sa Barangay Upper Laperian, Ramon Magsaysay sa alas 8:44 sa gabii, niadtong nilabayng adlaw, diin nadakpan ang duha ka lalaki ug nakuha ang 100 gramos nga gituohang shabu nga nagkantidad ug ₱680,000. Sunod nga adlaw, nadakpan usab sa Regional Drug Enforcement Unit 9 ug kauban nga yunit sa Barangay Talisayan, Zamboanga City ang usa ka 46-anyos nga high-value individual, nga nakuhaan ug 300 gramos nga shabu nga nagkantidad ug ₱2,040,000.
Gipailalom na sa kaso ang mga suspetsado ubos sa Republic Act 9165, samtang ang mga ebidensya giturn-over sa Regional Forensic Unit. Si Police Brigadier General Eleazar P. Matta, Regional Director sa PRO 9, mipasabot nga ang kalampusan sa operasyon nagpakita sa padayon nga dedikasyon sa PRO 9 sa pagkontra sa illegal nga droga ug sa pagpanalipod sa katawhan sa rehiyon.(JENIFFER JR. DELICA)