Aron mapalig-on ang kapasidad sa mga mag-uuma sa pagdumala sa ilang irigasyon, ang National Irrigation Administration – Zamboanga del Norte Regional Sub Office (NIA ZDNRSO) nagpahigayon ug usa ka pagbansay kalabot sa Operation and Maintenance (O&M) Policy Formulation Seminar-Workshop alang sa lima ka Irrigators Associations (IA) ubos sa Dipolog National Irrigation System didto sa Barangay Olingan, Dipolog City.
Ang maong kalihokan nagtumong sa pagpahugot sa sistema sa pagdumala sa tubig ug kanal, pag-uyon sa cropping calendar, ug pagtukod og klarong mga palisiya sa operasyon ug maintenance aron mapadayon ang episyenteng paggamit sa irigasyon.
Gibansay sa mga personahe sa NIA ZDNRSO ang mga partisipante sa pag-draft sa mga palisiya nga angay sa ilang lokal nga kondisyon, diin gipasiugda ang tinabangay, ug pagkamatinud-anon. Gibutyag usab sa mga mag-uuma ang dugay na nilang kabalaka sama sa water rotation, kanal nga nababagan, ug bayad sa irrigation service fees nga gihatagan ug solusyon pinaagi sa bukas nga diskusyon.
Kini nga inisyatibo nagpakita sa padayon nga suporta sa NIA aron mapahugtan ang partisipasyon sa mga Irrigators Associations isip kauban sa kalamboan sa agrikultura ug kalig-on sa pagkaon sa probinsya.(IKEN B. GULLEM)