Mipadayon ang kalihokan sa Department of Agriculture uban sa City Agriculture Office sa pagpahigayon og price monitoring sa bugas sa nagkalain-laing merkado ug rice retailers sa siyudad niadtong Mayo 25 isip kabahin sa kampanya sa gobyerno batok sa pagsaka sa presyo sa sukaranang pagkaon.
Atol sa inspeksyon, gisusi sa mga otoridad kon nasunod ba sa mga negosyante ang P50 matag kilo nga price cap alang sa 5% broken imported rice nga gipatuman sa tibuok nasud sugod niadtong Mayo 13. Gilauman sa gobyerno nga pinaagi niini, maprotektahan ang mga konsumante batok sa dili makatarungang pagpamahal sa bugas.
Matud sa mga ahensya, ang price cap magpabiling epektibo sulod sa 30 ka adlaw samtang ginabantayan gihapon ang dagan sa suplay ug presyo sa merkado. Posible usab kining mausab o mapalawig depende sa resulta sa padayong assessment sa kahimtang sa bugas sa nasud.
Nagkahiusang mitabang sa implementasyon sa maong lakang ang Department of Trade and Industry, Department of the Interior and Local Government, Bureau of Customs, Philippine Competition Commission, ug Philippine National Police aron mapalig-on ang pagsunod sa gitakdang presyo sa bugas sa merkado.(IKEN B. GULLEM)
Source: Dipolog City Government