Gidala sa Department of Environment and Natural Resources Region IX ang mga serbisyo sa gobyerno mas duol sa katawhan pinaagi sa ikaduhang hugna sa “Permitting on Wheels” nga gipahigayon sa CityMall Dipolog niadtong Mayo 25 hangtod 26, 2026.
Nagpahimutang og frontline services ang Environmental Management Bureau IX, Mines and Geosciences Bureau IX, Provincial Environment and Natural Resources Office sa Zamboanga del Norte, ug mga CENRO sa Manukan, Siocon, ug Piñan aron mohatag og mas paspas ug sayon nga serbisyo kabahin sa environmental permits, licenses, land patents, ug uban pang regulatory concerns.
Sa mensahe ni DENR IX Regional Executive Director Marie Angelique C. Go, iyang gipasiugda nga tumong sa maong inisyatibo ang paghimo sa serbisyo publiko nga mas accessible, responsive, ug episyente pinaagi sa direktang pagdala sa serbisyo sa DENR ngadto sa mga komunidad ug pagtangtang sa geographic barriers sa mga stakeholders ug kliyente.
Giduso usab ni Go ang mga negosyante, tag-iya sa yuta, lider sa komunidad, ug uban pang stakeholders nga makigkoordinar sa technical teams sa DENR aron mapahimuslan ang oportunidad sa real-time government assistance nga anaa sa maong kalihokan.(IKEN B. GULLEM)
Source: DENR ZAMBOANGA PENINSULA