Kapin 630 ka mga tawo ang nadakpan sa nagkadaiyang operasyon sa Cebu Police Provincial Office ubos sa ilang gipakusog nga “Safer Cities Initiative” kagahapon Mayo 25, 2026. Ang operasyon gipahigayon aron mapalig-on ang kalinaw, disiplina, ug kaluwasan sa lain-laing lugar sa lalawigan sa Cebu.
Base sa report sa CPPO, adunay 229 ka operasyon nga gihimo batok sa mga nilapas sa lokal nga ordinansa sama sa pag-inom ug pagpanigarilyo sa pampublikong lugar, paglakaw sa dalan nga walay pang-ibabaw nga sapot, paglapas sa curfew sa mga menor de edad, sobra oras nga videoke, ug paglapas sa traffic ordinances.
Sa kinatibuk-an, adunay 94 ka kaso sa pag-inom sa publiko, 21 ka kaso sa pagpanigarilyo sa publiko, 29 ka kaso sa paglibot nga walay sanina sa taas, 82 ka curfew violations, ug 403 ka traffic violations. Mokabat usab sa kapin ₱180,700 ang nakolektang multa gikan sa mga nadakpan.
Matod ni PCOL Abubakar Udang Mangelen Jr., importante ang padayon nga pagpatuman sa mga ordinansa aron malikayan ang krimen ug mapadayon ang kaluwasan sa komunidad. Iyang giingon nga pinaagi sa klaro nga presensya sa kapulisan ug istriktong implementasyon sa balaod, moubos ang kahigayonan sa mga kriminal nga kalihokan.
Gidayeg usab ni PBGEN Arnold Evangelista Abad ang paningkamot sa mga operatiba sa CPPO ug gipasiugda nga ipadayon ang kampanya sa tibuok probinsya. Samtang nagpahayag usab og suporta si Gob. Pamela Baricuatro, kinsa miingon nga importante ang panagtinabangay sa kapolisan ug lokal nga gobyerno aron mapadayon ang kalinaw ug kahapsay sa Cebu.
I via Renante Socia Lada