Gipadayon sa Local Price Monitoring Council (LPMC) sa Dipolog City ang pagbantay sa presyo sa mga basic necessities ug prime commodities atol sa ilang First Quarter Meeting alang sa 2026 nga gihimo niadtong Mayo 12 sa Museo Dipolog.
Gitambongan ang maong tigom ni City Administrator Atty. Valerie Hope B. Jauculan-Flores isip representante ni City Mayor Roberto Y. Uy, uban ni City Agriculturist Engr. Kerr N. Porlas, representante sa nagkalain-laing ahensya sa lokal ug nasyonal nga gobyerno, ug ang mga non-government organizations.
Gihisgutan sa maong miting ang kasamtangang kahimtang sa presyo sa mga importanteng palaliton sa siyudad lakip na ang mga isyu ug kabalaka nga makaapekto sa mga konsumidor.
Tumong sa konseho nga mapalig-on ang monitoring sa presyo aron maseguro nga makatarunganon ug stable ang presyo sa mga batakang panginahanglanon sa mga residente sa Dipolog.
Padayon usab nga nagtinabangay ang lokal nga panggamhanan ug mga ahensya aron maprotektahan ang interes sa publiko batok sa posibleng pagsaka sa presyo sa mga palaliton.(IKEN B. GULLEM)
Source: Dipolog City Government