Hapit nang makabaton og opisyal nga titulo sa yuta ang mga agrarian reform beneficiaries (ARB) sa Barangay Lower Irasan, Roxas human gipadayon sa Department of Agrarian Reform (DAR) Zamboanga del Norte ang proseso sa land acquisition ug distribusyon sa lugar.
Gipangulohan ni Provincial Agrarian Reform Program Officer II Daisy Dell Suan Digamon ang inisyal nga “pulong-pulong” uban sa tag-iya sa yuta ug pagpahigayon sa indibidwal survey alang sa matag benepisyaryo kauban si CARPO-LTID Teodulo J. Yanoyan Jr. ug mga personnel sa DARPO.
Ang 23.4986-hektaryang yuta ni Vicente Dalman, nga girepresentahan ni Engr. Leonardo B. Dalman, mipasalig sa bug-os nga kooperasyon sa DAR alang sa implementasyon sa agrarian reform program. Giawhag usab niya ang mga benepisyaryo nga ampingan ug atimanon pag-ayo ang yuta nga ilang pagadawaton.
Gipahayag usab ni ARB Jaime T. Pialago ang iyang kalipay ug pagpasalamat tungod kay human sa dugay nga pag-uma sa maong yuta, hapit na niya madawat ang opisyal nga titulo niini.
Matod sa DAR, kabahin kini sa ilang 2026 Land Acquisition and Distribution goals sa Newlands area aron mapalig-on ang katungod sa mga mag-uuma ug masiguro ang responsable ug malungtarong paggamit sa yuta.(IKEN B. GULLEM)
Source: DAR ZAMBOANGA DEL NORTE PROVINCE