Nagkahiusa ang Community Environment and Natural Resources Office (CENRO) Siocon ug ang Local Government Unit (LGU) sa Siocon sa pagpalig-on sa kampanya alang sa pagpanalipod sa kalasangan pinaagi sa usa ka Forest Preservation Summit nga gihimo sa Barangay Candiz.
Tumong sa kalihokan nga mapugngan ang nagpadayon nga mga hulga sa kinaiyahan sama sa kaingin, illegal logging, ug ilegal nga pagpanguha ug pagbaligya sa wildlife.
Si CENR Officer Rey A. Jalandoni maoy nanguna isip resource speaker diin iyang gipasabot ang mga programa sa DENR kabahin sa forest protection ug environmental management. Iyang gihisgutan ang seryosong epekto sa kaingin nga mahimong hinungdan sa pagkawala sa kalasangan, erosion sa yuta, ug peligro sa sunog sa kabukiran.
Gipahinumdoman usab niya ang publiko sa pagpatuman sa mga environmental laws sama sa Presidential Decree No. 705 ug Republic Act No. 9147 batok sa ilegal nga mga kalihokan sa kalasangan ug wildlife.
Matod ni Mayor Ceasar Soriano, importante ang kooperasyon sa matag sektor aron mapreserbar ang kinaiyahan ug mapanalipdan ang natural resources alang sa umaabot nga henerasyon.
Mitambong sa summit ang mga representante gikan sa LGU, Philippine National Police, Bureau of Fire Protection, ug mga opisyal ug residente sa Barangay Candiz nga gipangulohan ni Barangay Captain Cecile S. Sanchez.
Padayon usab nga gipalig-on sa DENR ug sa lokal nga panggamhanan ang ilang partnership sa mga komunidad aron mapadayon ang konserbasyon sa kinaiyahan ug responsableng paggamit sa natural resources.(IKEN B. GULLEM)
Source: DENR ZAMBOANGA PENINSULA