Miapil sa pagsaulog sa Adoption and Alternative Child Care Week (AACCW) ang Lokal nga Panggamhanan sa President Manuel A. Roxas pinaagi sa Municipal Social Welfare and Development Office (MSWDO) aron mapalig-on ang kahibalo sa publiko kabahin sa legal nga adoption ug alternatibong pag-atiman sa mga kabataan.
Gipasiugdahan ang maong kalihokan ni Mayor Ismael A. Rengquijo Jr. ug MSWDO Head Alfeo R. Bubutan pinaagi sa opisyal nga pagbutang sa AACCW banner ug pagpasundayag sa mga advocacy videos ug impormasyon sa opisina sa MSWDO ug Office of the Mayor.
Gidala sa tema nga “Love Makes a Family” ang mensahe sa kahinungdanon sa gugma, pag-atiman ug dedikasyon sa paghatag og luwas ug permanente nga panimalay alang sa mga batang nanginahanglan og proteksyon ug pag-amuma.
Tumong usab sa selebrasyon nga mapalapdan ang suporta sa komunidad alang sa mga programa sa adoption ug alternative child care, samtang gipasiugda ang katungod sa matag bata nga motubo sulod sa usa ka mahigugmaon ug maalagaron nga pamilya.(IKEN B. GULLEM)
Source e: MSWDO PRES M. A ROXAS