Aprubado na sa Regional Project Advisory Board (RPAB) ang tulo ka dagkong proyekto nga nagkantidad og kapin ₱682 milyon alang sa Zamboanga del Norte, nga gilauman makapauswag sa imprastraktura ug panginabuhian sa mga mag-uuma ug mga komunidad sa lalawigan.
Nanguna niini ang ₱543.35 milyon nga rehabilitasyon ug pagsemento sa Lanawan–Tambalang–Balakan–Salug–Sarawagan–Raba Farm-to-Market Road sa lungsod sa Godod, lakip ang Dipopor–Poblacion road section. Ang 22.63 kilometro nga proyekto gitumong sa pagpasayon sa transportasyon sa mga produktong agrikultural ug pagkunhod sa gasto sa pagbiyahe sa mga mag-uuma.
Giaprubahan usab ang ₱131.41 milyon nga pagpaayo ug pagsemento sa Sitio Kulibato (Logdeck)–Sitio Binawing Farm-to-Market Road sa Barangay Lintangan. Gilauman nga mapalig-on niini ang koneksyon sa mga komunidad ngadto sa merkado, mga lugar sa produksyon ug serbisyo sa gobyerno.
Lakip usab sa nakadawat og pag-apruba ang ₱8.02 milyon nga Copra Consolidation and Marketing Enterprise Project ubos sa Mindanao Inclusive Agriculture Development Project (MIADP). Ang proyekto nagpunting sa pagpalambo sa pagproseso ug pagpamaligya sa kopra aron madugangan ang kita ug oportunidad sa mga mag-uuma sa lubi.
Kini nga mga proyekto gilauman nga makatampo sa paglig-on sa sektor sa agrikultura, pagduso sa kalamboan sa kabaryohan ug paghimo og dugang oportunidad alang sa katawhan sa Zamboanga del Norte.(IKEN B. GULLEM)
Source: Zamboanga del Norte Provincial News Network