Kapin 30 ka locally funded teachers ang ipakatap sa nagkadaiyang pampublikong eskwelahan sa Dakbayan sa Dapitan aron matubag ang kakulang sa magtutudlo sa elementarya, junior high school ug senior high school.
Kini resulta sa panagtinabangay tali sa Department of Education (DepEd) Dapitan ug sa City Government of Dapitan pinaagi sa Local School Board, isip kabahin sa padayon nga paningkamot sa paghatag og accessible ug dekalidad nga edukasyon sa mga kabatan-onan.
Niadtong Hunyo 8, gipangulohan ni School Governance and Operations Division (SGOD) Chief Sherlito E. Sagapsapan ang pre-deployment orientation alang sa mga maong magtutudlo aron maandam sila sa ilang mga responsibilidad ug tahas sa mga eskwelahang ilang pagaserbisyohan.
Sumala sa DepEd Dapitan, ang maong inisyatiba nahiuyon sa 5-Point Agenda sa departamento ug sa SHRINE Strategic Framework, nga nagtumong sa pagsiguro nga walay estudyanteng Dapitanon nga mabiyaan tungod sa kakulang sa magtutudlo.(IKEN B. GULLEM)
Source: DepEd Tayo-Division of Dapitan