Pinaagi sa City Disaster Risk Reduction and Management Office (CDRRMO), nagpatawag ug usa ka Pre-Disaster Risk Assessment (PDRA) Meeting ang kagamhanang lokal sa Dipolog aron hisgutan ang mga lakang sa pagpangandam batok sa hulga ni Bagyong Tino, kagahapong adlawa, Nobyembre 3, 2025 sa Social Hall, City Hall Building.
Gipangulohan ang maong panagtigomm nila City Administrator Atty. Valerie Hope E. Jauculan-Flores ug Acting CDRRMO Officer Felipe T. Mangila, uban ang partisipasyon sa mga ahensya sa kagamhanan, uniformed units, ug ang 21 ka barangay sa dakbayan. Gituki niini ang kahimtang sa mga kagamitan sa rescue, kapasidad sa matag barangay sa disaster response, ug pagpangandam sa evacuation centers alang sa posibleng pagbakwit.
Si Ms. April Love Castillon sa PAG-ASA Dipolog mitaho nga si Bagyong Tino anaa sulod sa Philippine Area of Responsibility, nagdala ug hangin nga 120–150 kph ug molihok paingon sa kasadpang bahin sa Visayas sa gikusgon nga 25 kph. Tungod niini, gibutang ang Zamboanga del Norte, lakip ang Dipolog ug Dapitan, ilawom sa Signal No. 1, ug gidid-an ang tanan nga biyahe sa kadagatan.
Samtang, ang kagamhanang lokal nag-andam na usab sa mga dump trucks, graders, ug uban pang heavy equipment aron magamit dayon sa rescue operations kon magsugod ang emerhensiya. Giawhag usab ang tanang barangay nga magbantay ug mag-andam sa ilang BDRRMCs aron maprotektahan ang kinabuhi ug kabtangan sa mga residente.(IKEN B. GULLEM)