Gipahimangnoan sa lokal nga kagamhanan sa Dipolog, pinangulohan ni City Mayor Roberto Y. Uy, ang katawhan nga magmabinantayon batok sa mga epekto ni Bagyong Tino, nga karon anaa na sulod sa Philippine Area of Responsibility (PAR) ug nagsubay paingon sa Visayas region, lakip ang Cebu ug mga kasikbit nga dapit.
Matod sa City Disaster Risk Reduction and Management Office (CDRRMO), ang bagyo posible magdala ug kusog nga hangin ug dagkong pag-ulan nga makapahinabo ug baha, landslide, ug storm surge.
Subay sa mando sa DILG, gipangandaman na sa lokal nga kagamhanan ang mga lakang sa pagresponde ug pagpahibalo sa katawhan. Giawhag usab ang mga puy-anan duol sa suba, kabukiran, ug baybayon nga magbantay ug mag-evacuate dayon sa luwas nga lugar kung magsugod na ang makapiligro nga kondisyon sa panahon.(IKEN B. GULLEM)
Source: Dipolog City Government