Naghiusa ang Department of Agrarian Reform (DAR) Region IX, DAR Zamboanga del Norte, ug mga survey implementers kaniadtong Hunyo 13, sa usa ka Provincial Pre-Deployment Conference aron andamon ang pagsugod sa survey operations ubos sa Support to Parcelization of Lands for Individual Titling (SPLIT) Project.
Atol sa tigom, gipasiugda sa mga opisyal sa DAR ang kamahinungdanon sa hapsay nga koordinasyon ug tukmang datos aron masiguro ang episyenteng pagpatuman sa survey ug parcelization sa mga yutang sakop sa programa.
Sumala sa DAR, ang proyekto sa Zamboanga del Norte naglangkob sa 218 ka Collective Certificates of Land Ownership Award (CCLOAs) nga adunay kinatibuk-ang 1,731 ka ektarya nga yuta nga pagatumbokon alang sa pag-isyu og indibidwal nga mga titulo sa kwalipikadong mga benepisyaryo.
Gilauman nga ang maong lakang makatabang sa pagpalig-on sa tenurial security sa mga mag-uuma ug mopadali sa paghatag og indibidwal nga titulo ngadto sa mga Agrarian Reform Beneficiaries sa lalawigan.(IKEN B. GULLEM)
Source: DAR Zamboanga del Norte Province