Nag-andam og libreng serbisyong medikal ug dental ang Lokal nga Panggamhanan sa Roxas alang sa mga residente isip kabahin sa pagsaulog sa Araw ng Roxas 2026.
Sa pakigtambayayong sa Provincial Government of Zamboanga del Norte pinaagi sa Provincial Health Office, ipahigayon ang Medical ug Dental Mission sa Roxas Gymnasium aron mapalapad ang paghatag og mga serbisyong panglawas ngadto sa komunidad.
Manguna sa maong kalihokan ang mga doktor ug dentista gikan sa Rural Health Unit (RHU)-Roxas ug Provincial Health Office nga maghatag og libreng konsultasyon ug ubang serbisyo alang sa mga molupyo nga nanginahanglan og medikal ug dental nga atensyon.
Gilauman nga daghang residente ang mopahimulos sa maong programa nga nagtinguha sa pagpalig-on sa kahimsog sa komunidad pinaagi sa mas sayon ug mas maabot nga mga serbisyo sa panglawas.
Ang Medical ug Dental Mission usa sa mga kalihokan nga gilakip sa selebrasyon sa Araw ng Roxas, nga nagpakita sa paningkamot sa lokal ug probinsyal nga panggamhanan sa paghatag og direktang serbisyo ug kaayohan sa katawhan.(IKEN B. GULLEM)
Source: RHU Roxas