Nakasinati og dako’ng kausaban ang mga mag-uuma sa Mutia human makadawat ang Municipal Demo Farm og tulo ka yunit sa Multi-Purpose Solar Drying Trays (PORTASOL) gikan sa Department of Science and Technology (DOST) Region IX.
Tumong sa maong teknolohiya sa pagpaayo sa post-harvest nga proseso, ilabina sa pagpauga sa mga ani sama sa humay ug mais. Matud pa sa mga benepisyaryo, mas limpyo ug mas episyente na karon ang ilang pagpauga sa ani kumpara sa tradisyonal nga paagi nga ibulad lang sa gawas.
Kini nga PORTASOL adunay 12 ka patong nga trays nga nagtugot sa hustong sirkulasyon sa hangin, hinungdan sa mas paspas ug parehas nga pagpauga. Tungod niini, napreserbar ang kalidad sa ani ug misaka ang tsansa nga mapamaligya kini sa mas maayong presyo sa merkado, nga nakadugang usab sa kita sa mga mag-uuma.
Sa pagbisita sa DOST IX, gipadayag ni Mayor Lorrymir S. Adasa ang iyang pasalamat sa maong inisyatibo, nga giila niyang dako’g tabang sa pagpalambo sa panginabuhian sa lokal nga komunidad. Kini nagpakita usab sa padayon nga suporta sa gobyerno sa pagpalig-on sa sektor sa agrikultura pinaagi sa malungtarong teknolohiya.(IKEN B. GULLEM)
Source: DOST Regional Office No. IX