Padayon nga gipatuman sa lokal nga kagamhanan sa Dipolog ang duha ka mahinungdanong city ordinances aron mapadayon ang kalimpyo ug kahimsog sa komunidad, base sa accomplishment report sa City Health Office nga gisumite ngadto kang Roberto Y. Uy.
Sumala sa report, sulod sa bulan sa Pebrero 2026, mikabat sa 243 ka indibidwal ang nadakpan tungod sa paglapas sa City Ordinance No. 123 o ang Garbage Collection and Environmental Health Protection and Sanitation Code of 1998. Lakip sa kasagarang paglapas ang walay tabon nga basurahan, pagpanglabay og basura (littering), ug pagpangihi sa publikong lugar, ilabi na sa mga barangay sa Miputak, Olingan ug Central.
Sa laing bahin, 64 ka mga violators usab ang natala ubos sa City Ordinance No. 196 o Anti-Smoking Ordinance sa siyudad. Kadaghanan niini gikan sa Barangay Miputak, Central, Sicayab ug Turno.
Matud pa sa City Health Office, ang padayon nga pagpatuman sa maong mga ordinansa kabahin sa paningkamot sa siyudad aron mapalig-on ang disiplina sa publiko ug malikayan ang mga kahimtang nga makadaot sa kahimsog ug kalikupan.
Busa, nagpadayon ang panawagan sa lokal nga kagamhanan ngadto sa katawhan sa hugot nga pagsunod sa mga balaod aron malikayan ang multa ug aron mapadayon ang kalimpyo, kahapsay ug kaayuhan sa Dakbayan sa Dipolog.
Source: Dipolog City Government