Malipayon nga gipahibalo Police Regional Office IX nga malinawon ug malampuson ang pagpatuman sa Holiday Season Security Operations 2025 gikan Disyembre 16, 2025 hangtod Enero 2, 2026. Kapin tulo ka libo ka police personnel ug force multipliers ang adlaw-adlaw nga gipahimutang sa mga terminal, simbahan, pasyalan, ug uban pang lugar nga daghang tawo aron masiguro ang kahusay ug kaluwasan sa publiko atol sa holiday celebrations.
Sumala sa PRO 9, natala ang 24 ka insidente nga may kalabutan sa paputok, nga miresulta sa unom ka nasamdan ug walay namatay. Nakumpiskar usab ang kapin 33,000 ka firecrackers nga nagkantidad og kapin 837,000 pesos, samtang tulo ka persona ang nadakpan. Wala’y natala nga indiscriminate firing ug wala usab’y sunog nga nalambigit sa pyrotechnics. Sa Simultaneous Anti-Criminality Law Enforcement Operations, nasakmit ang 76 ka loose firearms ug nadakpan ang 41 ka persona sa ilegal nga droga, 46 ka wanted persons, ug 207 ka nalambigit sa illegal gambling.
Matod ni Police Brigadier General Edwin A Quilates, Regional Director sa PRO 9, ang malinaw nga selebrasyon resulta sa lig-on nga police presence, koordinasyon sa mga ahensya sa gobyerno, ug kooperasyon sa komunidad. Padayon ang heightened alert status sa kapulisan aron mapadayon ang kaluwasan ug kahusay sa rehiyon, subay sa tumong sa Philippine National Police nga maghatag og paspas, matinud-anon, ug mabati nga serbisyo sa katawhan.(JENIFFER JR. DELICA)
Photo Courtesy: Police Regional Office 9