Gihakot sa Municipality of Polanco ang kampeonato sa Kinabayo Festival 2026 Street Dance Competition human makab-ot sa Contingent No. 1 ang labing taas nga dungog pinaagi sa ilang makabungog nga pasundayag sa kadalanan sa Dakbayan sa Dapitan.
Ang kadaugan giila isip bunga sa paningkamot sa mga choreographer, dancers, drummers, propsmen, ug sa tanang working committees nga nagtinabangay aron masiguro ang kalampusan sa kontingente atol sa kompetisyon.
Gipasalamatan usab sa kontingente ang padayon nga suporta ni Mayor Ying Uy, Tourism Officer Designate Manuel R. Cajocon Jr., ug sa mga opisina sa Municipal Engineering, Municipal Disaster Risk Reduction and Management Office, Rural Health Unit, Special Program for Employment of Students, Tourism Office, ug sa tanang drayber nga mitabang sa maong kampanya.
Sumala sa Municipality of Polanco, ang maong kampyonato usa ka pagpamatuod sa talento, panaghiusa, ug gugma sa kultura sa mga Polancohanon nga mipasiugda sa ilang garbo atol sa Kinabayo Festival 2026.(JENIFFER JR. DELICA)
Source: Turismo Polanco