Nadakpan sa kapulisan sa Samboan Municipal Police Station ang usa ka wanted person nga nag-atubang og upat ka kaso sa Lascivious Conduct ubos sa Section 5(b) sa Republic Act 7610 o ang balaod nga nagpanalipod sa mga bata batok sa abuso, pagpahimulos ug diskriminasyon.
Nasikop ang suspetsado atol sa pagpatuman sa warrant of arrest niadtong Hulyo 16, 2026 sa Barangay Colase, Samboan, Cebu pinaagi sa usa ka intelligence-driven operation. Ang warrant gi-isyu sa Regional Trial Court Branch 62 sa Oslob, Cebu, ug adunay girekomendar nga ₱200,000 nga piyansa matag usa sa upat ka kaso.
Human sa pagdakop, gipahibalo ang akusado sa mga kaso nga iyang giatubang ug sa iyang mga katungod sumala sa Miranda Doctrine sa wala pa siya gidala sa hustong awtoridad.
Gipasidunggan ni PCOL Abubakar Udang Mangelen Jr., Provincial Director sa Cebu Police Provincial Office (CPPO) ang mga operatiba sa malampusong pagpatuman sa warrant.
Matod niya, seryoso ang CPPO sa pagpanalipod sa mga bata ug ipadayon ang kampanya batok sa mga wanted person aron masiguro nga maatubang nila ang hustisya ug magpabiling luwas ang komunidad.
📸 CPPO
I via Renante Socia Lada