Mokabat sa 681 ka tawo ang nadakpan sa operasyon sa Cebu Police Provincial Office (CPPO) ubos sa Safer Cities Initiative kagahapon Hulyo 24, 2026. Sa kinatibuk-an, 271 ka operasyon ang gihimo sa lainlaing lugar sa lalawigan.
Sa 681 ka nadakpan, 432 ang gipamulta samtang 249 ang gipasidan-an ug gipagawas. Nakakolekta usab ang kapulisan og ₱164,550 gikan sa mga multa.
Kasagaran sa mga nalapas mao ang pag-inom og ilimnong makahubog sa pampublikong lugar, paglapas sa curfew sa mga menor de edad, pagpanigarilyo sa pampublikong lugar, paglakaw nga walay t-shirt, pagpatukar og karaoke lapas sa gitugot nga oras, ug mga paglapas sa traffic ordinansa.
Matod ni PCOL Abubakar Udang Mangelen Jr., Provincial Director sa Cebu PPO, ang operasyon dili lang aron makadakop og mga nakalapas sa ordinansa kondili aron mapalig-on ang disiplina ug malikayan ang krimen.
Gidayeg usab ni PBGEN Arnold Evangelista Abad, Regional Director sa PRO-7, ang paningkamot sa mga pulis ug miingon nga ipadayon ang kampanya aron mapadayon ang kalinaw ug kaluwasan sa tibuok lalawigan sa Cebu.
📸 CPPO
I via Renante Socia Lada