Pito ka jail officer gikan sa Zamboanga del Norte ang opisyal nga gipromote sa Bureau of Jail Management and Penology (BJMP) Region IX atol sa Donning of Ranks ug Oath-Taking Ceremony nga gihimo kaniadtong Disyembre 22, 2025 sa Ciudad Christhia Resort sa San Mateo, Rizal.
Ang maong seremonya gitambongan sa mga opisyal sa BJMP ug gipahinungod sa pag-ila sa kakugi, dedikasyon, ug maayong serbisyo sa mga jail officer sa pagdumala sa mga piitan ug pagpanalipod sa kaluwasan sa publiko.
Lakip sa gipromote mao sila si JSUPT Manuel U. Calibo, Warden sa Dipolog City Jail; JCINSP Samuel Nasiad, Warden sa Salug District Jail; JCINSP Achmed Aziz A. Pia, Warden sa Siocon District Jail; ug JSINSP Rolly L. Paner, Warden sa Sindangan District Jail.
Gipromote usab sila si JSINSP Wilmar C. Mabilog, Assistant Warden sa Dapitan City Jail; JSINSP Arvin C. Recamara, Assistant Warden sa Salug District Jail; ug JINSP Prima T. Magallanes nga na-assign sa Female Dormitory sa Dipolog City Jail.
Sa mensahe sa BJMP Region IX Western Mindanao nga gipost sa ilang opisyal nga Facebook page, giingon nga ang maong mga promosyon nagpakita sa liderato, propesyonalismo, ug tinuod nga pag-alagad sa publiko sa mga opisyal.
Ang seremonya nagpasiugda sa kahinungdanon sa paghatag bili sa merito ug pagpalig-on sa liderato aron mapadayon ang maayong operasyon sa mga piitan ug ang kaayohan sa mga persons deprived of liberty sa rehiyon.(IKEN B. GULLEM)
Source: Zamboanga del Norte Provincial News Network