Nagpahimangno kagahapong adlawa Disyembre 22, 2025 ang kagamhanang lokal sa katawhan kalabot sa husto ug luwas nga paggamit sa firecrackers ug pyrotechnics atol sa umaabot nga Pasko ug Bag-ong Tuig.
Ang pahimangno giluwat pinaagi sa Business Permits and Licensing Office (BPLO) ubos sa pagdumala ni BPLO Chief Viola A. Pino, nga nagtumong sa pagpanalipod sa katawhan batok sa posibleng disgrasya nga kasagarang mahitabo ning panahona tungod sa walay tarong nga pagpabuto.
Hugot usab nga gihangyo ang mga ginikanan nga bantayan ang ilang mga anak ug dili pasagdan ang mga gagmay nga bata nga magpabuto, kay base sa rekord sa miaging mga tuig, kabataan ang kasagarang mabiktima sa aksidente.
Bisan tuod nahimo nang bahin sa kultura ang pagpabuto matag Pasko ug Bag-ong Tuig, gipasiugda sa LGU nga kinahanglan kini buhaton sa hustong paagi ug sa luwas nga lugar aron malikayan ang kadaot sa kinabuhi ug kabtangan.
Isip dugang nga lakang sa kaluwasan, nagpatuman ang lokal nga pangagamhanan kauban ang mga law enforcement agencies og mga precautionary measures, lakip ang pagdili sa pagbaligya sa dagkong klase sa firecrackers ug ang pagpugong sa pagbaligya niini sa nagkalain-laing dapit sa siyudad.
Sa dakbayan, gitugotan lamang ang pagbaligya sa pabuto sa Dipolog Boulevard, sa tumoy nga bahin, nga layo sa mga balay ug establisemento. (IKEN B. GULLEM)
Source: Dipolog City Government