Nangandam na ang Provincial Government of Zamboanga del Norte (PGZN) alang sa umaabot nga 16th Inter-Government Agency Sports Festival nga ipahigayon sa Setyembre 8 hangtod 11, 2025.
Ang mga empleyado ug kawani sa kapitolyo sa probinsya naglaan sa ilang oras matag hapon sukad Agosto 16 alang sa mga ensayo sa Saludo Competition ug sa nagkalain-laing sporting events isip pagpangandam sa maong kalihukan. Gipakita niini ang ilang pagpaningkamot, disiplina, ug panaghiusa isip usa ka grupo.
Gawas sa kasagarang dula sama sa basketball ug billiards diin pirmi nang nangibabaw ang PGZN sa miaging kompetistsyon, adunay dugang nga kalingawan usab karong tuiga pinaagi sa Search for Mr. and Ms. Inter-Agency Sports Festival, usa ka pageant nga magpasigarbo dili lang sa kaanyag apan lakip na sa kinaadman ug personalidad sa mga representante sa matag ahensiya.
Magsugod ang kalihukan pinaagi sa Kick-Off Parade sa Setyembre 8, diin mokuyog ang nagkalain-laing lokal nga ahensiya sa gobyerno sa tibuok probinsya. Apil sa parada ang contingents gikan sa Philippine National Police (PNP) Marshall, Zamboanga del Norte High School Turno Marching Band, ZNFEU Officers, Civil Service Commission-ZN Field Office, DepEd-Zamboanga del Norte, DepEd-Dapitan ug Dipolog, Department of Agrarian Reform (DAR), Department of Environment and Natural Resources-PENRO, Department of Public Works and Highways (1st ug 3rd Engineering Districts), Dapitan ug Dipolog City Water Districts, Jose Rizal Memorial State University (Dipolog, Dapitan, ug Katipunan campuses), DJRMH, ug uban pang kauban nga ahensiya.
Pagahimoon ang seremonyas sa pagbukas sa sports fest sa Zamboanga del Norte Convention and Sports Center, ug pagkahuman niini sugdan dayon sa hapon ang nagkalain-laing mga dula sama sa volleyball (lalaki ug babaye), kickball, badminton, pickleball, table tennis, lawn tennis, darts, chess, dama, billiards, mountain bike race, athletics/running, ug mga mental games sama sa Pinoy Henyo ug Quiz Bee, lakip na ang shooting competition.
Ang maong tinuig nga sports festival kabahin sa Philippine Civil Service Anniversary (PCSA) nga nagtinguha sa pagpahugot sa panag-uban, kahimsog, ug panaghiusa tali sa mga kawani sa gobyerno samtang gipasidunggan usab ang ilang dakong kontribusyon sa nasyon-building.(Jumalisa Papa)
Source: ZNPNN