Napahimuslan na sa mga mag-uuma sa Zamboanga del Norte ang 10 ka yunit sa portable solar dryers nga giturn-over sa Department of Science and Technology – Regional Office IX (DOST-IX) pinaagi sa Provincial Science and Technology Office – Zamboanga del Norte (PSTO-ZDN).
Kini nga yunit, nailhan isip “Portasol” o multi-purpose solar drying trays, gipanghatag sa mga asosasyon sa mag-uuma sa lungsod sa Mutia diin gigamit kini sa pagpauga sa Adlai, usa ka nag-uswag nga tanom sa maong lugar.
Lakip usab sa mga nakadawat ang mga mag-uuma nga nakabase sa Provincial Agri-Industrial Center (PAIC) sa Irasan, Roxas, ubos sa suporta sa Office of the Provincial Agriculturist – Zamboanga del Norte (OPAG). Ang mga solar dryers gamiton alang sa pagpauga sa cacao ug kape aron mapalambo ang kalidad sa ilang produkto. Gikatakda usab nga magdeploy pa og dugang nga mga yunit karong buwana alang sa mga mag-uuma sa lungsod sa Liloy.
Sumala sa DOST-IX, kabahin kini sa padayong paningkamot sa ahensya sa pagpalig-on sa post-harvest practices sa mga mag-uuma, pagtaas sa ilang produksyon, ug pagdasig sa malungtarong kalamboan sa sektor sa agrikultura sa probinsya.(IKEN B. GULLEM)
Source: DOST Regional Office No. IX