Gitinguha sa Provincial Government of Zamboanga del Norte ug Department of Social Welfare and Development (DSWD) nga mapalig-on ang Sustainable Livelihood Program (SLP) aron mas daghang kabus nga pamilya ang matagaan og kahigayonan nga makapundar og panginabuhian ug makabarog sa ilang kaugalingon.
Gihisgutan ang pagpalig-on sa programa atol sa panagtagbo sa mga personahe sa DSWD-SLP, Opisina sa Gobernador ug 3rd District Representative Adrian Michael “Ian” Amatong niadtong Hulyo 24.
Gipasiugda ni Governor Darel Dexter T. Uy nga kinahanglan masiguro nga ang mga programa sa gobyerno adunay tinuod nga epekto sa kinabuhi sa mga benepisyaryo ug ang pondo nga gigahin alang niini magamit sa hustong paagi.
Ubos sa SLP, ang mga kwalipikadong benepisyaryo mahimong makadawat og seed capital, skills training, cash for building livelihood assets ug uban pang suporta aron makasugod o makapalambo sa ilang panginabuhian.
Ang mga asosasyon nga adunay 30 ka miyembro mahimong makadawat og hangtod ₱900,000 nga suporta kon matuman ang mga success indicators nga gitakda sa programa.
Dili lamang paghatag og puhunan ang gipasidunggan sa programa, kondili ang pagtabang usab sa mga asosasyon nga mahimong malungtaron pinaagi sa pagpalig-on sa produksyon, pagpamaligya sa ilang mga produkto, pagpalapad sa merkado ug pagpalambo sa kapasidad sa pagpangempleyo.
Gipasiugda usab ni Uy ang panginahanglan sa pagdugtong sa SLP sa mga programa sa ubang nasyonal nga ahensya, lakip ang sektor sa agrikultura, Department of Science and Technology (DOST), Food Terminal Inc. (FTI) ug uban pa, aron mas mapalapad ang oportunidad alang sa mga benepisyaryo.
Giplano usab ang sunod nga panagtapok aron mas mapaayo ang estratehiya sa implementasyon sa SLP ug mahan-ay ang programa subay sa umaabot nga Provincial Development Plan 2027.(IKEN B. GULLEM)
Source: Zamboanga del Norte Provincial News Network