Gisusi sa Department of the Interior and Local Government o DILG ang performance sa 21 ka barangay sa Dipolog City alang sa unang semestre sa 2026 pinaagi sa “Revisiting Deliverables” activity aron mahibal-an ang ilang nahimo ug ang mga bahin nga kinahanglan pang mapalambo.
Gitutokan sa kalihokan ang pag-ila sa mga barangay nga nagpakita og maayong performance, samtang gihisgutan usab ang mga angay nga interbensyon ug teknikal nga suporta alang sa mga barangay nga nagkinahanglan pa og dugang giya.
Gihisgutan usab ang mga sukdanan sa Barangay-Based Institutions Performance Audits, Lupong Tagapamayapa Incentives Awards ug uban pang governance assessments. Gipaila usab sa DILG ang bag-ong paagi sa pagdawat og mga pangutana ug technical assistance requests, lakip ang anonymous submissions alang sa sensitibong mga isyu.
Dugang pa, gimando sa DILG ang tanang barangay sa Dipolog nga magpahigayon og Monday Flag Ceremony subay sa pamaagi sa City Government isip kabahin sa pagpalig-on sa disiplina, panaghiusa ug kalidad sa serbisyo publiko.(JENIFFER JR. DELICA)
Source: DILG Dipolog