Nakadawat og Disaster Relief Kit gikan sa Office of Civil Defense o OCD ang usa ka pamilya sa Gutalac kansang balay naguba tungod sa natumbang kahoy, isip gilayon nga tabang sa lokal nga panggamhanan ngadto sa mga naapektuhan sa kalamidad.
Gitunol ang maong hinabang sa Local Government Unit sa Gutalac ubos sa pagpanguna ni Mayor Eddie Justin T. Quimbo, kauban si Vice Mayor Aljohn Garzon ug mga miyembro sa Sangguniang Bayan nga sila Floro Serda Jr. ug Wilfredo Landong.
Sumala sa LGU Gutalac, ang maong assistance nagtumong sa pagtabang sa pamilya sa ilang nag-unang panginahanglan samtang nagbangon gikan sa nahitabo. Gipasalamatan usab sa lokal nga panggamhanan ang Office of Civil Defense sa padayon nga suporta ug paspas nga paghatag og hinabang.
Padayon, matud pa sa LGU Gutalac, ang ilang paghatag og dali ug angay nga serbisyo sa mga residente aron maseguro nga adunay suporta ang matag Gutalacnon nga maapektuhan sa kalamidad.(JENIFFER JR. DELICA)
Source: LGU Gutalac- Public Information