Gikatakdang magpahigayon ang Provincial Engineering Office of Zamboanga del Norte og repair ug embankment works sa Barangay Daanglungsod–Sinuyak–Sitog Provincial Road sa Katipunan human maapektuhan sa grabeng riverbank erosion ang Barangay Sinuyak.
Sumala sa assessment sa Municipal Planning and Development Office of Katipunan, ang kusog nga agos sa suba maoy hinungdan sa pagkaguba sa road shoulders ug pagkahuyang sa embankment sa pipila ka bahin sa kalsada, nga nagbutang sa risgo sa kaluwasan sa mga motorista ug residente.
Ang apektadong dalan nga ilalom sa Road ID: 09-72-00000-0036 maoy hinungdanong koneksyon sa mga barangay sa Daanglungsod, Sinuyak, ug Sitog ug gigamit sa adlaw-adlaw nga transportasyon sa mga residente ug pagbiyahe sa mga produktong agrikultural.
Lakip sa buhaton sa PEO mao ang embankment sa mga grabeng naapektuhan nga bahin sa kalsada ug repair works aron mapalig-on ang istruktura niini ug mapugngan ang dugang nga kadaot ilabi na sa panahon sa kusog nga ulan ug pagtaas sa lebel sa suba.
Gilauman nga pinaagi sa maong intervention, mapauswag ang kaluwasan sa publiko ug masiguro ang padayon nga agi sa mga komunidad nga nagsalig niini nga provincial road.(IKEN B. GULLEM)
Source: Zamboanga del Norte Provincial News Network