Giaprobahan sa Provincial Disaster Risk Reduction and Management Council (PDRRMC) ug Provincial Peace and Order Council (PPOC) ang paghimo sa Provincial El Niño Task Force atol sa ilang Joint 2nd Quarter Meeting niadtong Hunyo 29 sa Zamboanga del Norte Convention and Exhibition Center.
Gitukod ang Task Force isip kabahin sa pagpangandam sa probinsya batok sa posibleng epekto sa El Niño, subay sa weather ug climate outlook nga gipresentar sa Philippine Atmospheric, Geophysical and Astronomical Services Administration (PAGASA).
Ang resolusyon giduso ni 2nd District Board Member Michael Documento II ug giaprobahan sa kadaghanan sa mga miyembro sa konseho. Miduyog usab ang ChildFund Philippines sa maong inisyatibo pinaagi sa pagpahayag sa ilang intensyon nga mahimong miyembro sa Task Force, nga gidawat sa konseho.
Atol sa maong miting, naaprubahan usab ang pagmugna sa Provincial Infrastructure Audit and Inspectorate Team ug ang pagdugang sa DOST Provincial Office, CAAP ug PICE isip mga miyembro sa PDRRM Council aron mapalig-on pa ang disaster preparedness sa probinsya.(IKEN B. GULLEM)
Source: Zamboanga del Norte Provincial News Network